Aİ Ukraynanın 50 milyard avro yardım almaq üçün islahatlar planını təsdiqlədi

Avropa İttifaqı (Aİ) Şurası Ukraynanın növbəti dörd il üçün hərtərəfli islahat planını təsdiqləyib.  Qaynarinfo Aİ Şurasının bəyanatına istinadən xəbər verir ki, bu planın həyata keçirilməsi Ukraynaya 2027-ci ilə qədər 50 milyard avro məbləğində yardım almağa imkan verəcək və ölkəni Avropa İttifaqına üzv olmağa yaxınlaşdıracaq. Bildirilir ki, Ukraynaya maliyyə dəstəyi çoxpartiyalı parlament sistemi və qanunun aliliyi daxil olmaqla, demokratik mexanizmlərin saxlanması və hörmət edilməsi, həmçinin insan hüquqlarına təminatlı hörmət şərti ilə veriləcək. Aydınlaşdırılır ki, dəstək həmçinin korrupsiyaya, xüsusən də yüksək səviyyəli korrupsiya və çirkli pulların yuyulmasına qarşı mübarizənin effektivliyindən asılı olacaq. Bundan əlavə, bəyanatda deyilir ki, 2024-cü il martın 1-dən qüvvəyə minən dəstək proqramı 2024-cü ildən 2027-ci ilə qədər Ukraynanın bərpası, yenidən qurulması və modernləşdirilməsi üçün qrant və kreditlər şəklində 50 milyard avroya qədər sabit maliyyələşdirməni nəzərdə tutur. Qeyd olunur ki, Kiyev razılaşdırılmış siyasi şərtləri yerinə yetirdikdən sonra Aİ artıq 6 milyard avroluq aralıq maliyyə dəstəyi göndərib. Qeyd edək ki, "Welt” qəzetinin məlumatına görə, mayın 11-də Avropa İttifaqının 27 ölkəsinin səfirləri Ukrayna üçün təhlükəsizlik təminatlarını təsvir edən məxfi layihə üzərində razılığa gəliblər. Onun mətninə görə, Avropa İttifaqı dövlətə qarşı təcavüz halında Ukraynayla 24 saat ərzində məsləhətləşmələr aparmağı öhdəsinə götürür. Bununla belə, qəzetin yazdığına görə, səkkiz ölkə, o cümlədən Slovakiya, Macarıstan, Xorvatiya, Bolqarıstan, Kipr, İrlandiya, Avstriya və Malta saziş bağlamaqdan imtina edib. Nizami Bağırov