ABŞ Polşaya “Patriot”lar, "Abrams"lar və F-35-lər üçün 2 milyard dollar ayırdı

ABŞ Xarici Hərbi Maliyyələşdirmə Proqramı çərçivəsində Polşaya 2 milyard dollar kredit ayırıb. Bu barədə Qaynarinfo ABŞ Dövlət Departamentinin rəsmi nümayəndəsi Metyu Millerin Dövlət Departamentinin saytındakı bəyanatına istinadən xəbər verir.  "Polşa ABŞ-ın sadiq müttəfiqidir və bu razılaşma NATO-nun şərq cinahını daha da gücləndirəcək", deyə bəyanatda bildirilir. Miller qeyd edib ki, Polşa F-35 təyyarələri, "Patriot” raket sistemləri və "Abrams” əsas döyüş tankları kimi ABŞ-dan müdafiə avadanlığının alınması da daxil olmaqla geniş hərbi modernləşdirmə proqramı həyata keçirir. "Polşa NATO-da liderdir, hazırda ÜDM-in 4%-ni müdafiəyə xərcləyir, Alyansda ən yüksək göstəricidir. Polşada minlərlə ABŞ və müttəfiq qoşunları, o cümlədən ABŞ V Korpusunun Poznandakı qərargahı var", deyə o əlavə edib. Açıqlamaya görə, ABŞ bu kredit üzrə faiz dərəcəsini subsidiyalaşdırmaq üçün 60 milyon dollara qədər xarici müdafiə maliyyəsi təqdim edir ki, bu da ABŞ-dan təcili müdafiə malları və xidmətlərinin alınmasını dəstəkləməklə Polşanın müdafiə modernləşdirilməsini sürətləndirməyə kömək edəcək. Xatırladaq ki, Polşa Rusiyanın Ukraynaya müdaxiləsi fonunda müxtəlif ölkələrdən silah sistemləri almaqla fəal şəkildə silahlanır. Polşa prezidenti Anjey Duda NATO-nun nüvə silahlarını ölkə ərazisində yerləşdirməyə hazır olduğunu da bildirib. Duda həmçinin təklif edib ki, NATO üzvü olan ölkələr müdafiə xərclərini ÜDM-in 2%-dən 3%-ə qədər artırsınlar. Nizami Bağırov