Ukrayna Putinin nüvə doktrinasını dəyişdirmək təklifini "şantaj" adlandırdı

Ukrayna prezidentinin ofisinin rəhbəri Andrey Yermak Vladimir Putinin Rusiyanın nüvə doktrinasının dəyişdirilməsi təklifini "nüvə şantajı” və "təhdid” adlandırıb.  Qaynarinfo xəbər verir ki, o, bu barədə "Telegram" kanalında yazıb. "Rusiya Federasiyasında nüvə şantajından başqa heç nə yoxdur, dünyanı qorxutmaq üçün başqa vasitə yoxdur. Bu alətlər işləməyəcək”, - Yermak bildirib. BMT-nin Silahsızlanma Tədqiqatları İnstitutunun analitiki Pavel Podviq "The Washington Post”a bildirib ki, Rusiyanın nüvə doktrinasında dəyişiklik "cavab tədbirlərinin mümkünlüyü ilə bağlı qeyri-müəyyənlik və ikili fikir" yaratmaq məqsədi daşıyır. Nəşrin digər həmsöhbəti, adının açıqlanmasını istəməyən rusiyalı məmur daha əvvəl qeyd edib ki, Qərb Putinin bu cür təhdidlərinə qarşı "immunitet formalaşdırıb” və onlar "heç kəsi qorxutmurlar”. Xatırladaq ki, sentyabrın 25-də Vladimir Putin Təhlükəsizlik Şurasının iclasında nüvə doktrinasını dəyişdirmək üçün yeni təşəbbüslər təqdim edib. Digər məsələlərlə yanaşı, o, nüvə dövlətinin dəstəyi ilə qeyri-nüvə dövlətinin təcavüzünün Rusiyaya birgə hücum kimi qiymətləndirilməsini təklif edib. Rusiya prezidenti həmçinin "Rusiya dövlət sərhədini keçəcək aerokosmik hücum silahlarının kütləvi şəkildə buraxılması ilə bağlı etibarlı məlumat alınarsa” nüvə silahından istifadənin mümkünlüyünü doktrinada aydınlaşdırmağı təklif edib. Aerokosmik hücum silahları dedikdə o, strateji və taktiki aviasiyanı, qanadlı raketləri, PUA, hipersəs aparatları və uçuş vasitələrini nəzərdə tutub. Bu müddəa faktiki olaraq Rusiya ərazisindəki hədəflərə qarşı uzaqmənzilli Qərb silahlarından istifadə ediləcəyi halda, Rusiyaya Ukraynaya qarşı nüvə silahından istifadə etmək üçün əsas verir. Bundan əlavə, Putin adi silahlardan istifadə edilməklə belə, Belarusa qarşı təcavüz zamanı nüvə silahından istifadə hüququnun təmin edilməsini təklif edib. Onun sözlərinə görə, bütün bu məsələlər Belarus rəhbərliyi ilə razılaşdırılıb. Nizami Bağırov