Modi Putinə deyə bilər ki, mənə 1000 ukraynalı uşağı verin... - Zelenski

Hindistan hökumətinin başçısı Narendra Modi Ukrayna ilə Rusiya Federasiyası (RF) arasında müharibənin bitməsinə təsir göstərə bilər. Xüsusilə, Kiyev və Moskva arasında danışıqlar Hindistan ərazisində baş tuta bilər. Qaynarinfo xəbər verir ki, bu barədə Ukrayna prezidenti Volodimir Zelenski "The Times of India” qəzetinə müsahibəsində bildirib. Zelenskinin qeyd etdiyi kimi, Modi əhalisi, iqtisadiyyatı və nüfuzu baxımından nəhəng ölkənin baş naziridir. "Belə bir ölkə sadəcə olaraq deyə bilməz ki, biz müharibəni bitirməkdə maraqlıyıq - hamımız bunda maraqlıyıq. Baş nazir Modi Ukraynada müharibənin bitməsinə təsir göstərə bilər. Bu, onun istənilən münaqişədə böyük dəyəridir. Bu, Hindistanın böyük dəyəridir", - deyə Ukrayna prezidenti bildirib.  O əlavə edib ki, Rusiya iqtisadiyyatını, ucuz enerji resurslarını və düşmənin hərbi sənaye kompleksini bloklamaq Moskvanın Ukraynaya qarşı müharibə aparmaq imkanlarının azalmasına gətirib çıxaracaq. Zelenskinin sözlərinə görə, eyni zamanda Hindistan Ukrayna və Rusiya arasında danışıqları təşkil edə bilər. Lakin bunun üçün Ukrayna ərazisində müharibə getdiyindən məhz Ukrayna formatına uyğun dialoq hazırlamaq və təşkil etmək lazımdır. Bundan əlavə, Ukraynanın öz platforması var, yəni sülh sammiti. Zelenski əlavə edib ki, bu yaxınlarda elan edilmiş qələbə planı sövdələşmə predmeti və ya Rusiya ilə danışıqlar mövzusu deyil. Xüsusilə, bu, Ukraynanın NATO-ya dəvət edilməsinə aiddir. Ukrayna dövlət başçısının qeyd etdiyi kimi, Modi, Rusiyaya zorla deportasiya edilmiş uşaqların geri qaytarılmasında da Ukraynaya kömək edə bilər. "Siz Putini ukraynalı uşaqları geri qaytarmağa məcbur edə bilərsiniz... Baş nazir Modi öz təsirindən istifadə edib Putinə deyə bilər, mənə Ukraynaya qaytarılacaq 1000 ukraynalı uşağı verin. Qoy Baş nazir Modi ən azı 1000 ukraynalı uşağı geri qaytarsın”, - deyə Ukrayna prezidenti izah edib. Nizami Bağırov