Ukrayna böhranı ABŞ-ı XAOSA SÜRÜKLƏYİR – Bu layihə qəbul olunarsa…

Xəbər verdiyimiz kimi Ağ Ev tərəfindən Senata yeni qanun layihəsi təqdim edilib. Həmin qanun layihəsində məğzi ondan ibarətdir ki, ABŞ prezidenti Ukraynaya yardımı dayandıracağı təqdirdə onun impiçment məsələsi gündəliyə gətirilsin.  Bu qanun layihəsi ABŞ-ın siyasi cameəsində fırtına effekti yaradıb.  Çünki amerikalıların heç də hamısı Ukrayna məsələsində yekdil fikirdə deyillər. Xüsusilə də Respublikaçılar Partiyası nəinki Ukraynaya, ümumiyyətlə bütün xarici yardımların dayandırılmasını istəyir.  Partiyanın hazırkı Prezidentliyə namizədi Donald Tramp da bəyan edib ki, prezident kimi ilk işi yersiz xarici yardımları dayandırmaq olacaq. Ümumiyyətlə Respublikaçılar bir qayda olaraq diqqəti ölkə daxilinə yönəldirlər. Onlar ABŞ-ın daxili problemlərinin həllini prioritet hesab edirlər.  Respublikaçılar üçün xarici siyasət və beynəlxlaq məsələlər ikinci plandadır. Təsadüfi deyil ki, Tramp bildirib ki, seçkilərdə qalib gəlsə, miqrantların ölkədən çıxarılması üçün qəti və davamlı iş aparacaq. Nəzərə alaq ki, onun prezidentliyi dövründə, yəni 2016-2020-cı illərdə ABŞ-ın miqrasiya siyasəti 180 dərəcə dəyişdirildi. Qaydalar xeyli sərtləşdirildi. Amma Tramp hesab edir ki, bu sahədə görüləsi xeyli iş var.  Texas “düyün” Qeyd edək ki, ötən ay Texas ştatının respublikaçı qubernatoru Ağ Evə qarşı üsyan etdi. O açıq şəkildə bildirmişdi ki, Ukraynaya edilən yardımlar dayandırılsın və həmin vəsait Meksika ilə sərhəddə divarların inşaasına xərclənsin. Qubernatorun bu təklifi Vaşinqton tərəfindən eşidilmədi.  Ona görə də Texas rəhbərliyi Vaşinqtona qarşı etiraza qalxdı. ABŞ-ın 25 ştatının respublikaçı rəhbəri də Texas qubernatoru ilə həmrəy olduqlarını bildirdi. Lakin Ağ Ev etirazları zor gücünə dayandıra bildi. Hazırda etirazlar bir qədər səngiyib, amma hələ də davam edir.   Senat 95 milyard dollarlıq yardım paketini təsdiq etdi Ötən gün xəbər yayıldı  ki, ABŞ Senatı aylarla davam edən siyasi çəkişmələrdən sonra Ukrayna, İsrail və Tayvana 95 milyard dollarlıq yardım paketini təsdiqləyib. Məlumata görə, yardım paketinə Kiyev üçün 60 milyard dollar, İsrailin HƏMAS-a qarşı müharibəsi üçün 14 milyard dollar və Qəzza da daxil olmaqla digər münaqişə bölgələrinə humanitar yardım üçün 10 milyard dollar vəsait ayrılacaq. Göründüyü kimi, xarici siyasət və beynəlxalq münaqişələr Demokratlar Partiyası üçün əsasdır. Ona görə də bu ilin sonuna qədər ayrı-ayrı dövlətlərə maliyyə yardımları  paketi təsdiq edilib. Lakin Demokratların başbilənləri uzaq gələcək üçün də plan hazırlayırlar. Bunun da biri yuxarıda dediyimiz qanun layihəsidir.  Bu qanun layihəsi Demokratların məğlubiyyət sığortasıdır.  Əgər bu qanun qəbul edilsə, onda demokratlar seçkilərdə məğlub olsa belə rəqiblərinə heç də uzun vədə dözmək məcburiyyətində qalmayacaqlar. Çünki Respublikaçılar payızdakı seçkilərdə qalib gələcəkləri təqdirdə Ukrayna və digər ölkələrə yardımı dayandıracaqlar. Bu zamansa qanun dövriyyəyə girəcək və ABŞ prezidentinin impiçmenti həyata keçiriləcək. Beləliklə, ölkədə növbədənkənar seçkilər keçiriləcək.  Növbədənkənar seçkilərdə isə ağır zərbə alan Respublikaçıların qalib gələcəyi heç də inandırıcı görünmür. Göründüyü kimi ABŞ-ın siyasi cameəsində “yorğan” davası gedir və bu yolda ən müxtəlif üsullardan istifadə edilir. Bu da ABŞ demokratiyasının fəlsəfəsini və iç üzünü hər kəsə göstərir. Surxay Atakişiyev, Bizim.Media