Xəbər verdiyimiz kimi, 16-17 fevral tarixlərində Azərbaycan Prezidenti İlham Əliyev 60-cı Münxen Təhlükəsizlik Konfransında iştirak etmək üçün Almaniyada səfərdə olub. Bu səfər çərçivəsində Prezident İlham Əliyev 20-dən artıq rəsmi görüş keçirib. Ümumiyyətlə, Azərbaycan liderinin Almaniya səfəri çox məhsuldar olub. Bu səfərin çox böyük siyasi əhəmiyyəti vardı. Çünki 7 fevral növbədənkənar prezident seçkilərindən sonra Qərbin nəbzini yoxlamaq üçün bu səfər xüsusi önəm kəsb edirdi. Amma keçirilən görüşlər və təmaslar onu göstərdi ki, Qərb artıq Azərbaycanın müstəqil xarici siyasəti ilə barışmaq məcburiyyətində qalıb. Ən əsası Qərb Azərbaycanla güc dilində danışmaqdan əl çəkib.
Münxendə keçirilən bütün görüşlər bərabərsəviyyəli və qarşılıqlı anlaşma şəraitində keçdi. Görüşlərdə Azərbaycanın maraqlarına zidd olan heç bir məsələ gündəlikdə olmadı. Əksinə, İlham Əliyevlə baş tutan bütün görüşlər qarşı tərəflərin istəyi ilə gerçəkləşdi. Bu isə çox önəmli faktdır. ABŞ Azərbaycanla münasibətləri dərinləşdirməkdə maraqlıdır Azərbaycan Prezidentinin Münxen görüşündə diqqət mərkəzində olan məsələ ABŞ rəsimləri ilə olan təmaslar olub. Təsadüfi deyil ki, həm ABŞ Dövlət katibi Antoni Blinken, həm də ABŞ Prezidentinin xüsusi nümayəndəsi Con Kerri ilə İlham Əliyevin görüşü olub. Bu görüşlərdə qarşılıqlı maraq doğuran bir sıra məsələlər müzakirə edildi. Məsələn, Azərbaycanla ikitərəfli əlaqələri çox yüksək qiymətləndirdiklərini qeyd edən Dövlət katibi Antoni Blinken ikitərəfli münasibətlərin və ölkələrimiz arasında əməkdaşlığın daha da gücləndirilməsi üçün yaxşı imkanların olduğunu vurğulayıb. Ən əsası Blinken ölkəmizin başçısına görüşə vaxt ayırdığına görə təşəkkür edib. Con Kerri isə dövlət başçısını prezident seçkilərində qələbə və Birləşmiş Millətlər Təşkilatının İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyasının (COP29) Bakıda keçirilməsi münasibətilə təbriklərini çatdırıb. O Prezident İlham Əliyevlə görüşlərini məmnunluqla xatırlayıb. Görünən odur ki, bəzi Qərb mətbu orqanlarının yazdıqlarının əleyhinə olaraq, Ağ Evdəkilər Azərbaycan Prezidenti İlham Əliyevlə bundan sonra da qarşılıqlı anlaşma və bərabər səviyyədə işləməyə hazırdırlar. Almaniya da mövqeyini bildirdi Münxen səfərində diqqət çəkən digər məqam Almaniya Federativ Respublikasının Kansleri Olaf Şoltsun təşəbbüsü ilə Azərbaycan Respublikasının Prezidenti İlham Əliyevlə görüş olub. Bu görüşdə də qarşılıqlı maraq doğuran məsələlər müzakirə edilib. Olaf Şolts qeyd edib ki, COP29 əsnasında Ermənistanla Azərbaycan arasında əldə olunan kompromislər, COP29-un Azərbaycanda keçirilməsi sülh gündəliyinin də irəli aparılması üçün əlverişli imkanlar və şərait yaradır. Maraqlıdır ki, Kansler Olaf Şolts təşəbbüsü ilə Azərbaycan Prezidenti İlham Əliyevlə Ermənistanın baş naziri Nikol Paşinyan arasında üçtərəfli görüş baş tutub. Müzakirələr nəticəsində müəyyən razılaşmalar əldə edilib. Münxen görüşləri çox zəngin və yaddaqalan olub. Azərbaycan lideri dünyanın aparıcı şirkət rəhbərləri, maliyyə institutlarının başçıları və bir sıra dövlət və hökumət başçıları ilə görüşlər keçirib. Bu görüşlərin əksəriyyəti qarşı tərəfin təşəbbüsü və istəyi ilə baş tutub. Bu isə onu göstərir ki, ölkəmizə qarşı beynəlxalq maraq günbəgün artır. Bu da təbii ki, Azərbaycanın yürütdüyü açıq və qətiyyətli siyasətin nəticəsidir. Halbuki, Azərbaycan Prezidentinin Almaniya səfərinə kölgə salmaq üçün Qərbin bəzi siyasi dairələrinin dəstəyi ilə Ermənistan Azərbaycana qarşı təxribatlar törətdi. Belə ki, fevralın 12-də şərti sərhəddə 5 aydan sonra atəşkəs pozuldu. Bəzi qüvvələr bu təxribatdan istifadə edib Azərbaycanın üstünə gəlmək istədilər. Hətta Münxen sammiti ərəfəsində bundan Azərbaycana qarşı təzyiq aləti kimi istifadə etmək istəyənlər də oldu. Lakin Azərbaycanın həm şərti sərhəddə, həm də siyasi müstəvidəki qətiyyəti bədnam qüvvələrin planlarını yenidən pozdu. Təsadüfi deyil ki, Münxen görüşündə 12 fevral təxribatı barədə söhbət belə açılmadı. Çünki bədnam qüvvələr artıq fevralın 13-də lazım olan mesajı almışdı. Bir daha bədnam qüvvələr gördü ki, Azərbaycan öz prinsiplərindən heç bir halda geri çəkilməyəcək. Ölkəmizin və regionun təhlükəsizliyi, iqtisadi maraqları üçün də bundan sonra qətiyyətli və davamlı addımlar atılacaq. Münxen görüşündə diqqət çəkən digər məsələ isə Paşinyanın davranışı idi. Azərbaycan Prezidentinin sıx görüş qrafikinə rəğmən erməni baş nazir görüşməyə adam tapmadı. Əlacsız qalıb Avropadakı erməni diasporlarının nümayəndələrini başına yığdı. Bu görüşsə pessimist notlarla keçdi. Paşinyan acizanə şəkildə etiraf etdi ki, Qarabağ məsələsi artıq qapanıb və heç bir Qərb dövləti bunun gündəliyə gətirilməsində maraqlı deyil. Bir sözlə Münxen görüşləri Qərbin nəbzini yoxlamaq üçün əla platforma oldu. İki günlük görüşlər və müzakirələr göstərdi ki, Azərbaycanın beynəlxalq aləmdə nüfuzu və tərəfdaşları durmadan artır, Ermənistan isə beynəlxalq aləmdən təcrid olunur, küncə sıxılır. Surxay Atakişiyev, Bizim.Media